Во врска со неодамнешните изјави во јавноста на претставници на политичкиот живот во Република Македонија околу тргувањето со хартии од вредност на Берзата и контекстот во кој што се става функционирањето на Берзата, ја информираме јавноста дека Македонската берза АД Скопје не коментира настани кои излегуваат од предметот и карактерот на нејзината основна дејност и овластувања. Нагласуваме дека берзата единствено претставува место на кое се спојуваат понудата и побарувачката на хартии од вредност и се реализираат купопродажните трансакции. На Берзата не и е познат идентитетот на крајните купувачи и продавачи на хартиите од вредност во редовното тргување. Податоците со кои располага Берзата за самото тргување со хартии од вредност и податоците за работењето на котираните компании, согласно законските прописи, без одлагање и најтранспарентно се дистрибуираат во јавноста. Сакаме уште еднаш да потсетиме дека состојбите на берзите секогаш и во сите економии ја одразуваат кондицијата и перспективата на компаниите, но претставуваат и определена слика за перцепцијата на вкупните општествени случувања од страна на инвестициската јавност.